الڨنفود ... طلع الشوك إلي فيك

أية قلنا السلام عليكم يا معشر الثوار ...

 إي نعم الثوار إلي جبتو أحلى إنتصار، إلي راقد فيكم في الجامع وإلي ما يفارقش البار ... كبار وصغار ... نهاركم أحسن نهار !

سلام خاص بالمناسبة إلى ثوار الدقيقة تسعين ... أولئك الذين لا يعرفون قدر المدونين ولا حجم أنفسهم، ناس مغبونين ، توانسة مزيفين ، لا يعرفو لا حرية ولا حتى يحسبو الملايين !!

سلام لأحباء المعارضة ... أولئك الذين جابو صفر على العارضة ... ويعملو مسيرات مليونية ، وتحكي عليهم التلفزة الوطنية و نسمة قناة الإبن الوديع البديع ... لبوه الحنين ديما مطيع !

سلام إلى الحكومة ... إلي قالت بش تتلهى بالناس المحرومة ... أما القرعة طلعت مشومة ... قالو مظلومة !

سلام على شعب الخيام ... أولئك الذين غشاهم الظلام ... ونسيهم التونسي حين شبع ونام ... وحل "الميغا أبلود" (MegaUpload) وهبط الأفلام !

هذي مدونة الڨنفود ... مدونة التنبير بلا حدود .. ولمان الشهود على تقعيد العود ... هي مدونة الأصالة والحداثة ... هي صوت التدوين الحر والفم المر والطرقات إلي بكلي حفر ... هي مدونة الزوالي وإلي ما عندو والي ... توجهاتها سلفية اخوانية وسطية ماسونية حداثية ماركسية تعنيقية تفتيقية بنفسجية لا تستعرف لا بتعريف ولا بهوية ! 

اليوم في تونس نشهدو فراغ إعلامي كبير ... إلي عندنا إما البنفسجي القواد إلي عمل الفساد في البلاد وكرهتو العباد وإما الإعلام النزيه ولكنه جدي فوق اللازم والتونسي بصفة عامة يفد ... احنا بأسلوبنا الركيك ، وحبنا للتفريك وقربنا من عالم الدوانة و التدوين ... نحبو نعملو إعلام بنين ... مش إعلام بمعنى خبر كل دقيقة أما حويجة ليكس لا فيها لا كذب ولا تبلعيط وفيها شوية فكاهة بش تحبونا وتبرتاجونا ... وفي احلامكم تشوفونا ... نحن الڨنفود نحييكم وتنشد على أيديكم  ... بلاش كلام زايد ... وإنه لتدوين حتى حي النصر !    


وفي الأخير نخلوكم مع شيخ الڨنافيد، أطال الله في عمره : 

تونس بلاد الفيّاسة الكلام مضروب بالسافود

في كل خرجة و محواسة تسمع عيطة و شهود

كثروا فيها اللحّاسة و الصبر راو ليه حدود

يا بش تركح بالسّياسة يا يصيبك شوك الڨنفود