ياساده ياماده بعد التّحيه تجيكم الإفاده... يحكو على
بلاد عرّعور... من غير دستور... القناص حرّ يدور... والفاسد سعيو مشكور... حلّ عينك وإقرى بين السّطور...مهياش بلاد طهور... وجاوي وبخور.. بلاد ثوره... بانت عقابها العوره... وكلّو ماشي بالغوره...الزوالي قعد التّالي... ولاعندو حبيّب ولا والي..ومشات ناس... وجات ناس... والزوالي موش لباس... الزوالي معندوش لا حسابات ولا آفريات... ولا عينو بسهريات ولا بواتات... حاب على فليّسات... يجيبهم مقابل خدمات ... وموش تنازلات... يحب على المساواة... وتوزيع عادل للثروات... ويكره المحاباة ...
بلاد محرومه... ومتاكله ومذمومه... والحقوق فيها مهضومه... في التأسيسي قلنالهم احكيولنا على القصاص من عصابة الرصاص... وقف النائب القصّاص... وقال انا لست بصاصّ... فضحك الجميع بما فيهم القناص...
عملوا لجنة باش تتقصى الحقيقه ... وقالوا هذي مسأله دقيقه... والقضيّه حساسه وشايكه... وفي الأخير القناص مالو إلا ملايكه... ويزي بلا ركاكه... وخلي الوضع هككه...
بلاد غلبانه وتحتاج الإعانه... موش دوليه بل محلّيه... متعطنيش مقرونه وبطنيّه ... أعطيني شغل وعيشه هنيّه... ونفسّني حرّيه... ومتحرمنيش من الديمقراطيه... ومتجبدليش على الهويّه... والحوارات الجانبيّه... وركزلي في القضيه... ويزينا من المحاكمات المسرحيه... والقضايا الوهميه...
يا بــلد نخّــرك السّوس وتآمـرت عليك الزّنوس
وإلي ماعندوش فيك فلـوس لايعنّـق... لا يبُـوس
يا بلد كبرت فيك النفوس والبوليس على الكل يدوس
صراعنا عمرو ماكان جام وبرطــــاج
صراعنا صراع شوماج ويا تخدم... ياديڨاج
héyél !! Bravo
ردحذفالله يقدر الخير ..
ردحذف:(
@chayma ميرسي :)
ردحذف@chimere لباس تونس برجالها ونساها وإنشاء الله القادم خير:)