ڨنفوديات ليلية : #رجع_الكاميرا !!!

#رجع_الكاميرا هي حملة ضد سياسة الصابورة الكحلة ...

#رجع_الكاميرا هي حملة ضد التعتيم الإعلامي على  محاكمة قتلة شهداء الثورة ...

#رجع_الكاميرا هي حملة ضد طمس الحقائق والغمة ... 

#رجع_الكاميرا هي حملة لا هي حملة لدعم الحكومة ولا هي حملة لإسقاطها ... 

#رجع_الكاميرا هي حملة ماهيش ضد الشرعية ... أما الشرعية إلي مبنية على الكذب وأنصاف الحقائق ماعينيش بيها ...

#رجع_الكاميرا هي حملة ماهيش لتشكيك فالوطنية ... أما  الوطنية إلي ما تحركناش في القضايا العادلة ما حجتناش بيها ...

#رجع_الكاميرا هي حملة ماهيش ضد الجيش ... أما الجيش مدين للثورة ولازم يحميها ويساهم في انجاحها  ...

تعداو 7 أيام على إضراب الجوع إلي بداه رمزي بالطيبي من أجل تصحيح مسار المحاكمات

 والإضراب مازال متواصل  لليوم الثامن على التوالي  ...  

#رجع_الكاميرا هي قضيتنا الكل ومساندتها واجب على كل تونسي و ما تنساش الكاميرا هي سلاحك يا زوالي دافع عليها اليوم ... غدوة تدافع عليك وتوصلك صوتك ...

ڨنفوديات ليلية : معارضة الهانة..هزوها للجبانة

أيا سيدي السلام
 ...
عنا يجي شهر وواحد نافخينلو معدتو بحكاية التعويض المادي للمساجين السياسين  ...

هاو 750 مليار ... وبدات الحسابات والمزايدات ... وهو شورو بش ياخو 400 مليون ...

 حمة الهمامي بش ياخو 350 ... وهو يصرح يقول مانيش ماخوهم البطالة أولى ...

(مانيش بش نعلق على الشي هذا )

وناس تحكي وتزايد ... والنضال مش بالفلوس ... وبدات لعباد كالعادة شكون يعلي أكثر ويسيبو علينا الدروشة البودورو في الوطنية والنضال

بعد أيمات وبالتحديد  13-04-2012 وكيف كثر لحديث عملت موزايك حوار مع الوزير عالحكية وهذي كانت الإجابة

المصدر

كيف كيف حد ما سمع وحد ما شاف إلى حد إلي مشى فيبالي إلي المقال هذا ماريته كان أنا ... وهذي صنعة عنا التوانسة بمختلف انتمائتنا الإشاعة ينشروها 2000 والتكذيب ينشروه 5 عباد

وتواصل الحديث والشوط مالشيرات الكل ... لين جا النهار إلي المجلس بش يناقش فيه الميزانية التكميلية

: وياعيني كيف تلقى بعض نواب الشعب نسخة مطبقة للأصل لحرافيش الفيسبوك ... أيا سيدي شد عندك

لنائب هشام حسني : مش عاجبو تخصيص الحكومة لمبلغ 750 مليار لتعويض المساجين السياسيين ...
باهي السيد هذا مخسرش حتى الوقت بش يقرا  مشروع الميزانيّة ويحل عينيه بش يعرف إلي مفماش منها لحكاية هذي

النايب الموقر هذا ما يبعدش برشة على الجعب المثقفة إلي تاخو في أخبارها من مواقع كيف موقع الجريدة 

متع سيء الذكر "بن تيشة " ومن صفحات أو حاويات النفايات على الفيسبوك ...

وإذا كان لحكايه على الفيسبوك ممكن تتعدى مانفهمش الوبش هذا إلي خايف على فلوس الشعب من تصرفات الحكومة ينجمشي يحترم الشهرية إلي ياخو فيها هو من عرق الشعب  (وحاسبينو عبد وينجم ينفع لبلاد هذي بحاجة) .. ويقوم بأبسط الأشياء وهي قراية الوثائق إلي يفرقوا فيها عليه  قبل ما يحل جلغتو !!؟

أنا وأمام هذه الصبيانية نقترح على رئاسة المجلس تشريلو كراس عدد 72 من النواع الرفيع وتعاقبوا بكتابة مشروع الميزانية 100 مرة وما يرجع يحط تراميه فالمجلس إلا ما يكمل خدمتوا ويجيب بوه فماش ما فروخ المراهقة السياسية تتعلم تحترم البلاصة إلي قاعدين فيها  

 من شيرة أخرى عندك مداخلة "قط البكتيريا" سي سمير بالطيب  وإلي حسب كلامو هو  اللي عذّبهم و سجنهم بن علي  الشعب التونسي ماهوش ذنبو يعوّضلهم
... ويستشهد بماندلا إلي رفض التعويض مع العلم إلي ماندلا كان مشي فيبالو إلي الشي إلي عملو بش يستعملو سي سمير كحجة للمطالبة بمنع التعويض على ضحايا الإضطهاد تو يتراجع في القرار متاعو ويعتذر
ونحب نذكر النايب هذا إلي كان جا عنا برشة عباد كيف ماندلا راك شادد دارك تتفرج فيهم فالتلفزة وماكش قاعد تتمخرق علينا فالمجلس التأسيسي إنت وبرشة كيفك

 بالطبيعة هذا نوع المعارضة إلي يلنصي الحكومة خاصةً كيف تسمع الإجابة هذي من عندها

فيبالي لعباد مغرومة بالمقارنة مع التجارب الموجودة فالعالم خاصةً كيف تبدى حاجة مشتركة بين البلدان إلي عاشت فترة كيفنا
والمفروض إلي شي كيف هذا مهوش بدعة عملتها الحكومة هذي وصار في برشة بلدان ...
والمفروض زادة النقاش وخاصةً من "النخبة" إلي فالمجلس وبرشة أصدقاء دايرين بيا في فيسبوك وتويتر ما تناقشش الاشعات

ويا أخي ممكن نفهم إلي مايلزمش التعويضات تكون ثقيلة على حال البلاد وفما برشة شوانط أخرى محلولة ونتصور هنا يكون الحوار.
 كل طرف يحول يقدم أحسن حل يراه ،حلول عملية بش يصير فما توازن ونجمو نخرجو بحل
زعمة المعارضة ماتكون صحيحة كان كيف تقول "لا" !!؟
تي أضعف الإيمان نقولو إلي الحكومة تدرس الموضوع مليح وتحاول تعوض ...
إذا يطلع الأمر مستحيل تحقيقه نستينفو وكان الدنيا هانية خلي إلي عندو حق ياخذو
وحتى أنا اعطوني حويجة (بخلاف شهرية ضرب البندير) راني مالغزول برك وليت واحد من جرحة الثورة 

تذكير للناس إلي ذاكرتهم كيف "الرام" متع الكمبيوتر وللناس إلي كانت عايشة في كوكب أخر من كواكب مجرة درب التبانة...النضال مهوش بمقابل أما قبل ما تحكي برى اسال على معاناة لعباد إلي كانت ضد النظام ...
فما ناس اطردت من خدمها وملقاش شكون يخدمها على خاطرو سجين سياسي..
فما عباد اطردت مالقراية وتقضا على مستقبلها... فما عايلات جاعت وملقاتش شكون يساعدها  ..
فما ناس انتحرت...فما جرائم ضد الإنسانية صارت في وقت بن علي وبورقيبة والتعويض للعباد هاذم ماهوش مزية ..


تقعد المحاسبة ومحاكمة المجرمين هي أحسن تعويض ليهم ... وهنا حقها المعارضة تنقصلنا ملريق البارد متع المفسدة وتضغط فالإتجاه هذا ممكن تنفع أكثر البلاد والعباد
(حسب سي سمير بالطيب فما ناس من التجمع نظاف صاير فيهم حالهم يسخف ... غريبة ساعات يولي حنين الحلوف)  ...

لكن هذا ما يمنعش إلي شهداء الثورة وعايلاتهم يلزمهم تعويض وعندهم حق علينا ماهوش مزية
جرحى الثورة  يلزمهم تعويض وعندهم حق علينا ماهوش مزية  ...
وشهداء وضحايا الإستبداد والقمع زاده يلزمهم تعويض وعندهم حق علينا ماهوش مزية
... "الشعب" إلي تحرك بين 17 ديسمبر و14 جانفي كان تحرك 20 و30 سنة لتالي ممكن برشا رهو حالنا خير من هكا ... والكلنا مسؤولين علي صار..وحقوق الناس هذي معلقة في رقبتنا لقيام عيسى يا أوباش

وسمعني النشيد

قدمت لكم هذه التدوينة برعاية قطر للبترول ... ملتزمون بالتفوق

ڨنفوديات ليلية : دليلك الاساسي ... في فهم الإعجاز السياسي

أيا سيدي قلنا السلام

يروى والعهدة على الراوي أنه في حوار أجراه وزير الخارجية رفيق عبد السلام مع جريدة "الشرق" القطرية قال بأن ما أنجزته الحكومة الحالية أشبه بالمعجزة خلال مائة اليوم و قد سجلت نجاحات مشهودة رغم و جود مجموعات صغيرة تعمل على إرباك الحكومة ووضع "العصا في العجلة"
بغض النظر عن صحة التصريح
دعوني اتفق مع هذه الفكرة ... بل دعوني أجزم بأن ما رأته عيناي من هذه الحكومة خلال مائة اليوم هو فعلاً معجزة سياسية بكل ما للكلمة من معنى  ...

: فالمعجزة السياسية يا اصدقائي هي وبكل بساطة  

 أن تصبح ذكرى عيد الشهداء فرصة لترسيخ مفردات جديدة ودخيلة على ثقافتنا مثل كلمة

 "الديمقراطية" 

...

"ديموكراسي"

 هي في أذهان البعض تعني "حكم الشعب لنفسه " ...وهي في  معجم  العقيد معمر القدافي 

 "جلوس الدهماء على الكراسي " ...

وتعني أيضاً في معجم  وزارة الداخلية 

 "حماية الدهماء وتعزيز ثقتهم في رجالات الأمن ... بالمشطه، بالراس ، بالزلاطي وحتى بضرب الكراسي ... "
 ***

 أن تجعل من صبيانية بعض الأحزاب المعارضة عملاً جليلا ومن دخول شارع الحبيب بورقيبة فتحا مبينا
***

 أن تقوم بالقضاء على ما تبقى من صور المخلوع في مكاتب الوزارة ... موتوا بغيظكم  وليشرب من ماء البحر المعارضون والنبارة
***

 عندما يتحول عاشق الكفتة وبريك الدنوني (بطل المرمز علوش 3 مرات على التوالي في دورة تونس المفتوحة للمطاعم الشعبية) النائب الجليل في المجلس التأسيسي أيمن الزواغي

من المطالبة بالعشاء والحق المقدس في القيلولة  إلى التمرد و المطالبة بإسقاط الحكومة
***

 ان ترتفع اسعار المواد الاساسية ... واعيش علي حلم صحن تسطيرة وسلاطة مشوية
***

 أن تصبح تصريحات سيد الوزير ... أشبه بتصريحات "الحلاق" وأغاني فيراج الزناطير
***

 أن تتحول الدولة إلى مرتع للهوام ... تديرها حكومة يحميها بوليس المخلوع ،لجان ثورية  و قطعان من الأغنام  ... وأعتى معارضيها شيخ يقود أسراب من عبدة الأصنام

الاعجاز السياسي يا رفيق ... هو
 أن تحول ثورة وقودها البطال ... وأحد رموزها  غول يلقب بالقناص ...
إلى مهزلة ساهم في صناعتها التجمع  وأحد أبطالها مهرج إسمه القصاص 

 ...

20 فيفري...سجّل ياتاريخ

 سلام على شعب تونس الأبيّه صاحب الطلعة البهيّه...

شعبنا الطيّب عمرو مكان جاحد او ناكر للجميل بدليل إنّو كافئ المناضلين وعطاهم صوتو وخرّجهم من دهاليز الداخليّه ومن كابوس المراقبة الإداريّة ،وفي القصر حطْهم وعلى دستورو وكلّهم. شعب ناضل وكافح عقود من غير حسابات ولا تكبّين.. فقط من أجل عيش كريم.إتّفقوا على كلمه وحده من غير ماعرفوا بعضهم من الجنوب للشّمال "شغل  ،حرّيه ، كرامه وطنيّه".بطبيعة الحال كجزء من هذا الشعب المعطاء كان لنساء تونس الدّور الأهم في فصول الثّورة...  ضحّات بالغالي والعزيز في لحظات ومن غير تردّد، ساعات حاجات تفوق التّصور ومنّها المعجزة إلي أقدمت عليها أمّهات الشّهداء وهي إنّها فرطت في ولدها وبنتّها في وقت كان الكثير والكثير عايشين بشعار "أخطى راسي وأضرب".والأكيد كان ماشي في بالها إنّو هكه المدّ التّضامني إلي راتو أيّام الثّوره باش يواسيها ويكون لها خير خلف لخير سلف خاصّة وإنّو كل شيء يهون في خاطر تونس.

مات السّلف وإنقطع الخلف ولقات روحها تدّور في فراغ كبير، فراغ فراق العزيز وفراق الوطن...كان الخيط إلي يربطها بينها وبين الوطن. كانت تشوف روحها فيه ،أمنيّاتها ،سندها إلي باش يعوّضها حرمان السّنين كان كلّ شيء وأصبح لاشيء...

هذي الحقيقه المرّه إلي جابتها محاكمات مابعد 14 جانفي وممارسات الحكومه الغنوشيّه والسّبساويّه والتّرويكيّه،البداية كانت بالمساومة الدنيئه على دماء الشّهداء بمنحه مختلفتشي برشه على إلّي كان راصدها  بن علي باش يسكتّهم بها ومن بعد إهمال جرحى الثّوره وإلي مكانتش من أولويّات السّيد الغير محترم الباجي قايد السبسي وإلّي راح ضحيّتها الشّهيد " حسونه بن عمر" .كلّو كوم وتونس مابعد الإنتخابات كوم ثاني ففي عهد غير المأسوف عليهم محمد "شُهر أتوّلى" والسّبسي "شُهر قناصة إشاعه "  تعرفوا الكل كانت فمه أطراف تزعزع الإستقرار وأطراف مايساعدّهاش تونس تنجح والحاصل تسمع كان أطراف واحنا نعرفوهم وباش نتصداولهم ومن بعد حِل الصرّه تلقى خيط وبقينا على ها الحال للي بزغ فجر الترويكا وظهر الحق وزهق الباطل وتكبير وتكفير وكلات بعضها،الحكومه تقول أطراف في المعارضه قاعده تعطّل في عمل الحكومه والمعارضه تقول أطراف في الحكومه قاعده تلتف على الثّوره والمواطن التونسي بقى يتدرّجح من طرف إلى آخر وإن تعددت الإتهامات فالضحيّه واحد وهوالزوالي إلي قاعد يتفرّج في عجب ربّي والمتضرّر الواحد وهوما عائلات الشهداء إلي في كل جلسه ياكلوا ماكتب من إهانات وتجريح (لقطة المجرم المنصف العجيمي في البال ).

إلي صار في الكاف بتاريخ 20 ـ 02 ـ 2012 وصمة عار في وجه كل تونسي آمن بقضيّة القصاص من عصابة الرّصاص. وقتّلي عائلات الشّهداء تحاول تعبر الحدود الجزائريه كتعبير عن إحتجاجها( ولو كانت حركه رمزيّه إلا أنّو عندها ابعاد كبيره ويكفي نقول إنّها إحدى الحركات إلّي إستخدمها سكّان المناطق الحدوديّه للتّعبير عن تجاهل السّلط النوفمبّريه لمطالبهم) أعرف عزيزي المواطن إننّا في الطريق الخطأ وإنّا بعدنا برشه عن أهداف الثّوره وهاي فرصه باهيّه باش تشلبق روحك وتفيق.

وفي الاثناء كانت النّاس تستنى في تصريح للحكومة حول الزيارة الاخيره للسّعوديه وإلي كان من المفروض باش تكون زياره مطالبة بحق القصّاص وإسترجاع الأموال المنهوبه.القصّه ومافيها طّلع علينا مستشار من ضمن هكّه الفيلق الإستشاري يشغّل منصب وزير وهو الأخ لطفي زيتون إلّي تكلّف  بالتّعبير عن مدى خوفنا من جرح مشاعر الامير إلي الحقيقه ميهمنيش إسمو ولامشاعرو ولا سي السيّد العاطفي لطفي زيتون اللّي جرح مشاعر المواطنين التوانسه وواصّل تكريس سياسة التْسَكّبين(التّمسكين).كلمه فقط للسيّد العاطفي يا اخي علاه هكه!!؟ وإلا تعرف كيفاه اهبط للڨصرين وإلا سيدي بوزيد وعبرّلهم على مشاعرك النبيله وكان روحت صحّه.

وخير الكلام ماقلّ ودلّ لذلك يكذّب عليك إلي يقولك أطراف وعناصر مشبوهه تريد إجهاض الثّورة لإنّو عزيزي المواطن بيدك الحل والربط ،عيش حرّ مستقل وفيّ لمبادئك خمّم في مصلحة تونس قبل مصلحتك وساعد في البناء ولا تساعد على الهدم.

ويا اهالي الشهداء بالله سامحونا انتم وردة فوق رؤوسنا وحقكم علينا وبكل لطف ارجو ان تعبروا على غضبكم في ارضكم فتونس كانت وستبقى ولاّدة ووفيّه لدماء أبنائها.

ڨنفوديات ليلية : شڨلابه

شي عادي انو يكون فما إختلاف حول قرار طرد السفير السوري من تونس...

بين إلي يرى انو قرار جاء في وقتو وبين إلي يراه متسرع إنجموا نحكيو ...

أما بين جماعة المؤامرة  "الصهيو-قطرو-أمريكية"  وبين ايتام البعث في تونس اللي يرو في بشار بطل من ابطال الأمة   بصراحة ما تسلكش وملخر إلي يحب يحكي معايا فالموضوع هذا يجيني للحومة نتضاربو لصباح

لحقيقة متع ربي  أنا نميل أكثر للرأي إلي يقول انو الخطوة باهية أما كان من الأحسن إنو وزارة الخارجية تطلب مالتوانسة بش تروح لبلادهم قبل ما نمشو في حكاية  كيف هذي 

لكن حسب علمي الشي هذا ما صارش ...

على خاطر تصور واحد مخلي ولدو بحذى الناصر الدامرجي "سفاح نابل" ويهز يكلمو بالتليفون يسبلو والديه ... 

بطبيعة شي يخوف

لكن  ومن ألطاف الله جاء الموقف المناسب في الوقت المناسب من الرجل المناسب واللي للأسف ماهوش فالمكان المناسب 

المصدر

وهبت الجماهير، العصافير  وخاصةً الصراصير وأطلت علينا من قنوات الصرف الصحي و من مزابل التاريخ 

في حركة عفوية ، تلقائية بنديرية فوق البنفسجية  لتهلل وتمرح بهذا الخبر السعيد

وبهذا التدخل الرشيق، للرجل الأنيق ذو الإشعاع الدولي والبريق 

("في رواية أخرى  "كلاس )

 

بون اوكي يزيني ماضربت البندير ... ونخليكم  مع الجوقة الموسيقية هذي

نرجعو للتشبيه الأول وتصور تو إلي بعد ما واحد هز التليفون وسمع سفاح نابل الكلام ... 

يكلموا العربي الماطري بش يوصيه على الوليد ويقول بربي حطوا في عينيك

!!! إي تو بالحق سيطمئن قلبي املا لا

تو بغض النظر على صحة لحكاية هذي وفي إنتظار التأكيد ولا النفي من الصفحة الرسمية لحزب المبادرة

(رغم إلي الصفحة هذي مقربة للحزب)

المشكلة الأولى  فالخبر وهي في المقطع هذا 

"الخارجية السورية تستجيب ... معتبرة الجالية التونسية بمثابة مواطنين سوريين"

معناتها ولادنا بش يمشيو قزاز ... برحمة بوك لا !!! احسبهم رواسا ... شناوة ... تي حتى هنود أما سوريين لا

أما المشكل الثانية هو  إلي الناس إلي فرحانة بالخبر هذا  بخلاف حبهم وطحينهم الأعمى لسي كمال فإنهم عندهم ثقة في الخارجية السورية يا ولدي تقول ماخذين الأمان من عند “النجاشي” ملك الحبشة ... 

تو بجدهم نظام كيف نظام بشار تنجم معاه تأمن حتى على قطوس !!؟

على العموم هو بان بالكاشف بعد 14 جانفي إلي الطحين هذا وباء مش بش نتخلصو منو على قريب 

ويجري في دم شريحة كبير من أبناء هذا الوطن العزيز

ومن هنا إلى أن يأتينا الخبر اليقين ... شوكة شوكة إلى ايتام بن علي وأبناء مرجان من الرضاعة

"ونهديلهم أغنية العربي الماطري "شڨلابه

(أهوكة الرابط متاعها محبيتش نحطها هنا  بش ما نزيدش  إنجس المدونة أكثر ملي نجسوها ولاد مرجان )

وبرى  نهاركم طيب سيدي